فرحه العسكرى فرحات..

برجاء تفتيح الدماغات لما هو ات :
العسكرى فرحات


العسكرى فرحات دهه عسكرى غلبان زيه زى مليون عسكرى امن مركزى نصفهم فى ماشات الكوره والنصف التانى فى مواكب التشريفه وقمع مظاهرات الطلبه وطالبى التغيير...والعسكرى فرحات له اربع اخوات ذكور والاربعه بشتغلوا فى شرم الشيخ واحد نقاش والثانى ممحارتى والثالث سباك والرابع كهربائى وكلهم فى شرم الشيخ ...يشتغلوا الصبح ويتسرمحوا بالليل ومستقبلهم ضايع وعقلهم خربان ..زيهم زى ربع الشباب بتوع اليومين دوووول ....بيجبوا فلوس وبيضيعوا فلوس وطبعا امهم وابوهم فقدوا الامل فى رجوع ابناءهم الى الطريق المستقيم ولم يبقى لهم منهم الا اخونا فرحات ..وعملوا البدع وكلموا اعيان البلد علشان يخلوا ابنهم فرحات جنبهم فى العاصمه فى وظيفه كويسه ...واستجاب الله دعاءهم ووفقوا فى توظيفه فى الامن المركزى بعد مشقه وعذاب

واخونا فرحات فرح فرحه اللى غاب ورجع واللى كان فقير وكسب شهاده الميلونير ...بس ادفع ميه جنيه وانت تبقى زيه يا فالح دهه قمار ياجماعه مش مهم المهم الميلون جنيه ؟..المهم ان اخونا فرحات اتوظف حراسه على البنك المركزى اللى انا مش عارف هو فين ..المهم انه اهم بنك فى مصر كلها وبيحطوا النقد الاحتياطى فيه ويقفلوا عليه بالضبه والمفتاح ويطلعوا الفلوس كل يوم سبت علشان تتهوا علشان متعفنش ...ايوه يا ناصح انت لو حطيت فلوسك تحت المرتبه كام يوم ممكن تعفن وتاكلها العته وطبعا بتوع الماليه عيال نصحه وعارف الحاجات ده مش زيك حاشر نفسك فى كل حاجه وعامل نفسك ابو العريف ..
المهم ان اخونا فرحات كل يوم سهران من الساعه تمانيه مساءا للصبح علشان مرتب يزيد شويه ..

يييييييييييييوه برضه انت ...انت مش هتجيبها لبر ..انت العضو الغير مريح بتاع كل موضوع انت العضو اياه اللى عايز تدخل الموضوع وتعمل شوشره عليه وتبوظه كل مره تعمل دوشه وتعمل غيغه وتقعد تقول وتعيد الحكايه مش عجباك ومش حلوه ومش فيها حاجه ..طب ياسيدى هو ده اللى عندى وعلى فكره كذا منتدى طلبوا الابراهيميات ومنهم منتديات اجنبيه ومواقع عالميه وجوجل طلب يحطه فى السرش وياهو طلبه فى المختارات وعايزنى اعمل منتدى مخصوص لحكايات الابراهيميات وعرضين فلوس كويسه قوى ..بس انا طبعا رفضت انا وطنى وباحب بلدى ومش ممكن ادلوهم حاجه ممكن تبقى مفخره للاجيال القادمه ..الحمد لله مستوره من كام عيان بيجوا ويرحوا ومش بيخفوا خالص والحكايه ماشيه ومش محتاجين حد يتامر علينا
ويتحكم فينا ..وهى العشره بس والعشره ما تهنش الا على ابن الحرام ..ويكفينى الكم عضو اللى بيقروها وانا راضى ومش عايز زياده
ممكن تنقطنا بسكاتك ..وبلاش غمغمه وكلام لجوه ..ايوه كده ربنا يهديك ...ويا نحله مش عايز عسلك ولا تقرصينى ..ويابنى الحكايه لسه بنبنيها..وناسس مكوناتها ولا عايز مكونات صينى ممكن مع اى قراءه تروح وما ترجعش انا باحط احسن مكونات كلها اصليه ومكلفانى شئ وشويات ..انا اللى رغاى ..طيب انا هافوت الكلمه ده علشان انا مؤدب ومش هارد عليك ..وانا هاكمل الحكايه علشان روعه الاداء لازم توصل للقراء اللى انا باحبهم
المهم يا سيدى ..الاخ فرحات كل يوم يروح الشغل ويحرس البنك المركزى بالليل وفى يوم كان فرحات كان عنده ابوه بيخد المرتب منه وقعد معه لغايه العصر ينبه وينصحه من بنات مصر وخصوصا اليومين دول ..
يابنى انت شايف المسخره اللى البنات فيها ومحدش بقى عنده خشه ولا دم ولاحيا وكلهم بيلبسو حاجات كده متتلبس ...والبنات مش لاقيه تتجوز وهيفرحو لما يلقوا واحد زيك فى وظيفه محترمه متوظف فى بنك زيك وممكن يطمعوا فى القرشين اللى انت بتبعتهم البلد ..اوعه يا فرحات من بنات مصر ..انا باقولك وبانصحك ..باوعيك وبانورك .وبافهمك وببصرك وسمعك الكلام قبل ما يقع الفاس فى الرس وتطير رقبتك وتقول ياريت اللى حصل ما حصلش وياريت حد قالى وادينى قلتك .اوعه يا فرحات ..دى البنات زى التعبان تتدحلب عليك لغايه ما تتمكن من زماره رقبتك وتخنقك وتعمل فيك اللى هى عايزهه .. وتركب وتدلدل رجليها ..وتبقى لمؤخذه زى الركوبه اللى فى البلد انت يبقى عجبك منظرك كده ..شايف ولا هاقولك ..اوعه يا فرحات ..افتكر يا فرحات ..اوعه تنسى يا فرحات ..
واخذ الكلام الحكيم الوقت الجسيم من زمن نوم فرحات المسكين
وبالليل كان نوبتجيه اخونا فرحات وقعد زى كل يوم امام البوابه الرئيسيه بتاعه البنك ..وبعد فتره كبس عليه النوم ..ولم يدرى كام من الوقت مر عليه وراح ..ولم يفق الا على قلم صروخ على خده اليمين وتابعه قلم اقصد الم مدفعيه على خده الايسر ..والحق بقذيفه يد(العسكرى ) خد(فرحات ) واخونا فرحات ارتمى على الارض وبعد فتره غير قصيره فاق من الغيبوبه ..وبص لفوق ولاقى خمستشر ضابط وثلاثين عسكرى من اصحابه ودفعته ومسدس بيحاول يخرم راسه بالضغط والزغد ..فيه ايه يا بيه هو اللى حصل ..فوق يا اخوى وقلى انت فتحت البنك لمين باب البنك مفتوح وصفاره الانذار شغاله ..فوء كده وكلم سعاده البيه ..انا مش عارف حاجه يا بيه ..قوم معنا نشوف النقد الاحتياطى بتاع الدوله ومتستهبلش علينا ..الدنيا لفت ودارت باخونا فرحات واصبح السواد هو اللون اللى شيفه قدامه واصبحت الاشخاص خيالات رماديه تتحرك وشوف انت ايها القارئ العزيز بقه اما الرمادى يتحرك فى الاسود يبقى المنظر شكله ايه والصوت بقى همس جى من بعععععييييييييييييدددددد ..
مستقبلك راح يا فرحات وضاعت الوظيفه وابوك وامك هيجوعوا ويشردوا ومش تجوز ابدا ...انت رحت فى ستين داهيه يا فرحات ..يا شماته اخواتك الفاشلين فيك يا فرحات ..يا خيبه الامل فيك يا فرحات ..هترحو السجن يا فرحات ..هتتحبس ويحطو الكلابشلات فى ايديك والبلد كلها هتتفرج وتفرح فيك يا فرحات ..وممكن جدا يطلعو اسمك فى الجرايد القوميه والمعارضه طبعا مش هتسيبك علشان تتنقم من الحكومه ..
رحت فى شربه ميه يا فرحات
ويفيق الاخ فرحات على واحد بيطبطب عليه ويقوله فوق يابنى الموضوع اتنهى على خير المدير كان جوه اصله نسى مفتاح الشقه ورجع ياخده ومكنش واخد باله من صفاره الانذار حصل خير ..
الحمد لله كله تمام ومفبش حاجه اتسرقت بس تبقى تنام كويس فبل ما تيجى الشغل
وطبعا الاخ فرحات فرح فرحه كبيره قوى خالص ما تتوصفش زى فرحه واحد كان داخل السجن وطلع براءه وكان متهم بقلب نظام الحكم وزى فرحه واحد كان مسافر اسوان وناسى الشيك اللى كان هيحصله وطلع الراجل اللى كان هياخذ منه الشيك نصاب وحرامى وفرح انه نسى الشيك علشان النصاب ميخدوش وفرح زى واحد تانى مذكرش حاجه والامتحان اتلغى تانى يوم على طول ....
طبعا مش عجباك بس انت كنت تعرف تخلصه من شويه الضباط اللى كانو حواليه زى ما انا خلصته ..طويله خالص ..طب انا اعمل ايه هى الحكايه جات كده غصب عنى ومعلش سامحنى وانا اول مره اطلب منك حاجه ..يا بببباى ده انت فعلا عضو غير مريح
واخيرا سلامى دون تحياتى لمن لم يرضى بموضوعى اللى انا تعبت فيه وطلعت روحى لغايه ما انقذت اخونا فرحات ..و انا مش عايز تقييم من المدير ولاحاجه ويكفينى الكم عضو اللى بيقدرو وبيفهمو ..