عساكم ما تفقدون غالي

يا الله يا اللي عالم ما جرالي
يارب طه وربي ورب البيت

يا الواحد المعبود يا عز والي
يا للي تميت الحي ثم تحيي الميت

الطف بعبد غربلته الليالي
زود على الهوجاس حيرة وتشتيت

باسباب علم أحسب إنه خيالي
أثره حقيقة والحقيقة تشقيت

من يومها لليوم ما ارتاح بالي
وقلبي تفتت بين الأضلاع تفتيت

على الذي يسوى جميع الغوالي
هي دنيتي ما غيره اللي تمنيت

قالوا توفى قلت واعز تالي
يا ليتني من دون نورعيني توفيت

وش عاد من بعد العزيز بقا لي
عز الله إني بعده ما تهنيت

جالس مع العالم وكني لحالي
دوم أتذكر جلسة أبي بها البيت

مره هنايجلس ومرة قبالي
ومرة يجي جنبي ومرات لاجيت

البيت كنه عقبه كوخ خالي
والحال كنه عقبه عود كبريت

والدمع سال ولا بقالي مجالي
غير أزعج الونات لأصبحت وأمسيت

قالوا تصبر كلنا للزوالي
لابد يجيلك يوم ويقال قفيت

قلت الصبر عيا يطيق احتمالي
حاولت أنا أصبر دونه لكن أزريت

وشلون أبا أنسى عمري اللي غدالي
نور يوجهني ليا تهت واخطيت

ثم طاح سيفي وانكسر كل عالي
في ليلة الاثنين لو ما تشكيت

في ليلةٍ حكم القدر فيه مالي
ليل على قلبي قضى بالتناهيت

لا عاده الله للحبايب ولا لي
يوم خذا نورعيني حفظته ولا نسيت

قبلته قبلة موادع لغالي
عقب الضما من دمع عيني ترويت

ودعيت ربي يا عزيز الجلالي
بعطفك ولطفك ترحم ابي وصديت

وأيقنت في نفسي وقلبي قرا لي
من صفحة أيام الزمن لو تناسيت

إن البشر للتراب والجسم بالي
واليوم مات هو وبكرة أنا ميت