دمعة ندم

رشفة وهم : فحة ظمأ : نفحة هيام = أحساس مدري بالشعر كيف أقوله !!

الله وكيلك أمتلا صدري الآم = من موتي لآخر سنين الطفوله !!

دمعة أمل جفت على أرض الاوهام = جفت قبل كف الثرى لاتطوله

دمعة ندم وآقـفـت على رمش الاحلام = صمله شجاعه بخوف نفسٍ جفوله

دمعة قهر سالت على خد منظام = أصدق من اللي مايكــّذب رسوله

جمرة سهر ( ترمد ) وأذا جيت آبنام = شبت تقول الويل نـوّخ ذلوله

قلت أنطفي ماني على خبرك العام = أصعب من اللي مستحيله حلوله

واللي على خلقه فرض دين الاسلام؟ = أن الحزن في داخلي صار دوله

من يوم ماتت .. كن ماقبلي أيتام = أشوف حلمي لكن أزريت أطوله

أخـطـتـني أسهامٍ وصابـتـني أسهام = قولٍ يترجم ماتمنيت قوله

ليثٍ ولد ليثٍ ولد حر ضرغام = والقول تلقى شاهده قبل أقوله

والله يالولا حلم بعيون الايتام = والوقت الاقشر يحتويني ذهـوله

أن جيت أعاني من صواديف الايام = ماجيت أبوصف طرف ( نجلا وخوله )

وأن جيت أصـــّور بالقصايد مائة عام = ماجيت أدوّر بالقصايد عموله !!

جيتك مثل ماصخر الشعر الألهام = أحساس شاعر مايجي بالسهوله

هـذا أنا ميت ظمأ وأنزف هيام = أرقى بحلمي ويـتـعـّــثــر حصوله

هـذا أنا رغم أحتظاري من أعوام = مازلت حـيٍ يـسـتــثـيـرك مثوله‍‍