اليوم الوطني

يا وطن دام هالعز وأفراحك تدوم
يوم غنت لنا الذكرى بعنوانها
ما نبيع بثرى مجدك ولحدن يسوم
والليالي أثبتتلك صدر برهانها
جيت يا وجه تاريخ السعد والقروم
الذيابه تقانب ويل عدوانها
علموا العالم اللي طورته العلوم
ما يساوي فجوجن زين ريضانها
فدوتن لك بلدنا بالوفا فاللزوم
فدوتن لك ديار الكفر باوثانها
غن مثل الهداد اللي بعالي يحوم
ما تشوف بطرفها كود جنحانها
وافتخر فوق في حد السماء والنجوم
وين مكه وطيبه يا عظم شانها
يا وطن لا تقول اللي تبيه مخدوم
دامنا في ذراك ورايتك عانها
ساسك الرايه اللي في غلاها نقوم
كلمة الدين والتوحيد نيشانها
التهاني تكاشف مثل برق الغيوم
والملامح بتعبير الفرح خانها
لحظتن تستثير الشعب من كل قوم
تحتفل بالرياض وطييب فرسانها
بيض الله وجه اللي برأيه صروم
فوق ظهر الأصيله مرخي عنانها
صبّح الغافل اللي في سباته حلوم
دك حكم الطغاه وزاح طغيانها
ووحد الرايه العليا بثبت الختوم
وعز بعض العرب من بعد حقرانها
وشيّد البيت يوم البيت كان مهدوم
وبين أصل الحياه وبين ألوانها
لين شفنا الرغد هتان وبله ردوم
ما تفرّق حضرها بين بدوانها
وسع الله قبره بأمر ربن رحوم
وسكن الله روحه عالي جنانها
والسعد لبسه وأكساه حلو الهدوم
عزوتن لا اعتزوا في نوره اخوانها
ياعسى الله يديم ملوكنا كل يوم
ويحفظ أغلى بلاد ويحمي أركانها