ظليت أنا عــــانس لعيون منصور !!

هم حيرونا إلبعضنا دون ندري...
من يوم حنّا صغار في عمر الزهور


مايصير يمر ذكره من دون ذكري...
منصور ن لحصه وحصه لمنصور


جمله تضحكني طفله ولا أدري!!..
إملخصه الدنيا في لعب وسرور


أقصى حدود الهم لعبه بحجري ...
أبثّها سرّي وأحسب لها شعور !!



تسمع ولا إتجاوب ..أغتاض واجري ...
وارميها والحاصل إذراع مكسور



ثم أرجع أبكيها ويضيق صدري ...
واستجدي إرضاها والدمع مهدور




إترد بي الذكرى وأشياء تطري ...
أتمتم وأضحك جاهل ومعذور



ياهي بريئه حيل أيام صغري ...
لا أفكر ببكرا ولا أنام مقهور




في يوم ن وليله ودّعت فجري ...
يوم دارت الدنيا والدنيا إتدور



خط الشوارب وصار رجّال بدري ...
ذاك الصغير اللي يشقح على السور




وماعدت أنا طفله وبطلت أجري...
خطيت لي الكحله وذريت العطور




رجّال يدخل بيتنا وناس تسري...
كل واحد منهم ناطر بهالدّور



كثروا خطاطيبي ومنصور يدري ...
يدري ولا جاني ولاهو إبمجبور



مدري علام أهلي دنّوا بقدري...
وكل ماإنخطب قالوا حصه لمنصور؟



هم حيروني له من قبل لدري...
مرت سنين العمر وجفيت مالجور


شاب الشعر يابوي شف شاب شعري...
وضليت أنا عانس لعيون منصور